പതിവുപോലെ ഞാൻ ഗായത്രിയെ കുളിപ്പിച്ച് കുറുക്കുകൊടുത്ത് ഉറക്കാൻ കിടത്തി. രാരിരോ മൂളാൻ തുടങ്ങി. അപ്പോൾ വാതിൽക്കൽ ചുവന്ന കണ്ണുമായി ഗംഗയെത്തി.
അവൾ പറഞ്ഞു, "അമ്മേ വേറെയൊന്നു പാടാമോ? എത്ര വർഷമായി ഇതുതന്നെ കേൾക്കുന്നു."
ഞാൻ കഷ്ടപ്പെട്ട് വേറേ രണ്ടു പാട്ടു പഠിച്ച് പാടാൻ തുടങ്ങി,
"ആറ്റുനോറ്റുണ്ടായൊരുണ്ണീ- അമ്മ
കാത്തുകാത്തുണ്ടായൊരുണ്ണി,
അമ്പാടിക്കണ്ണന്റെ മുന്നിൽ - അമ്മ
കുമ്പിട്ടു കിട്ടിയ പുണ്യം."
അവൾ വീണ്ടും പ്രത്യക്ഷപ്പെട്ടു. "അമ്മ കള്ളം പറയല്ലേ. ഞാനാണ് അമ്പാറ്റീടെ മുന്നിൽ കുമ്പിട്ടു പ്രാർത്ഥിച്ചത്."
അതുശരിയാണ്. കുറേ നാൾ അവൾ 'അനിയത്തിയെ തരണേ' എന്ന് പ്രാർത്ഥിക്കാറുണ്ടായിരുന്നു.
ഞാൻ 'ഇന്നാ പിടിച്ചോ' എന്നു പറഞ്ഞ് അടുത്ത പാട്ടു പാടാൻ തുടങ്ങി.
എല്ലാ പാട്ടിന്റെയും നാലു വരിയേ അറിയൂ.
"കണ്ണും പൂട്ടിയുറങ്ങുക നീയെൻകണ്ണേ പുന്നാരപ്പൊന്നുമകളേ.
അമ്മയുമച്ഛനും ചാരത്തിരിപ്പൂ
ചെമ്മേ നീയുറങ്ങോമനക്കുഞ്ഞേ"
വീണ്ടും ഗംഗ ചൂടായി, "നുണ തന്നെയാ പാടണത്. ചേച്ചിയും അമ്മയുമാ ചാരത്തിരിക്കുന്നത്."
"ഓ! എന്നാ നീ തന്നെ നിന്റെ അനിയത്തിയെ പാടിയുറക്കിക്കോ" എന്നുപറഞ്ഞ് ഞാൻ പാട്ടുനിറുത്തി.
അവൾ പാടാൻ തുടങ്ങി,
"എൻ‌കുഞ്ഞുറങ്ങിക്കൊൾ-
കെൻകുഞ്ഞുറങ്ങിക്കൊൾ-
കെൻകുഞ്ഞുറങ്ങിക്കൊൾകെന്റെ തങ്കം...
നാളെപ്പുലർകാലത്തുന്മേഷമിന്നത്തെ-
ക്കാളുമിണങ്ങിയുണർന്നെണീപ്പാൻ"
അതാ... നമ്മുടെ കഥാനായിക ഉണർന്നെണീക്കുന്നു...!
കാരണമുണ്ട് കേട്ടോ... അവളെ ഒന്നര മണിക്കൂർ പാടി ആട്ടിക്കഴിഞ്ഞാൽ അര മണിക്കൂർ ഉറങ്ങും.
ഇപ്പോൾ പാടിത്തുടങ്ങിയിട്ട് രണ്ടുമണിക്കൂർ കഴിഞ്ഞിരുന്നു.
രഞ്ജിനി
വീട്ടമ്മ
സ്വദേശം മുവാറ്റുപുഴ
