ഫ്യൂഷൻ ഇൻ കൺഫ്യൂഷൻ

കാലത്തിന്റെയാവും, അമ്മിണിക്കും കുഞ്ഞുണ്ണിക്കും വാക്‌പ്രയോഗങ്ങളിൽ ചില വികൽപങ്ങൾ.

രാജപ്പൻ ചേട്ടന്റെ പച്ചക്കറിക്കട മകൻ ഗോപൻ നടത്തിത്തുടങ്ങി.
അമ്മിണിക്കത് ഗോപപ്പൻ ചേട്ടന്റെ കടയായി!

9:50ന് സ്വാമി അയ്യപ്പന്റെ സ്ഥിരം പ്രേകഹകനായിരുന്നു കുഞ്ഞുണ്ണി.
സൂര്യ ടി വി ശ്രീഗുരുവായൂരപ്പൻ തുടങ്ങിയതോടെ ദാ വീണ്ടും കൺഫ്യൂഷൻ.
ശ്രീഗുരുവായൂരയ്യപ്പനാണ് അവനിപ്പോൾ കാണുന്നത്!

കുഞ്ഞുണ്ണിയുടെ അംഗൻവാടി അവസാനിക്കുന്നത് ജനഗണമനയിലാണത്രേ...
അവൻ പാടും, "ജനഗണനാഥാ, സിന്ദൂരവർണ്ണാ, കരുണാസാഗരാ..." !

എഴുതിയത്...

കൃഷ്ണപ്രിയ

മലയാളം അദ്ധ്യാപിക

സ്വദേശം ആലുവയ്ക്കടുത്ത് മാറമ്പിള്ളി

ഗായത്രീടെ നല്ലോണം

അച്ഛൻ വന്നില്ല, പിച്ച നടത്തീല

പിന്നെന്തേ മാവേലി, ഓണം വന്നു?

അമ്മിണി വന്നില്ല കുമ്മിയടിച്ചീല

പിന്നെന്തേ മാവേലി, ഓണം വന്നു?

അമ്മായി വന്നില്ല, കമ്മലണിഞ്ഞീല

പിന്നെന്തേ മാവേലി, ഓണം വന്നു?

വല്ല്യച്ഛൻ വന്നില്ല മുല്ലപ്പൂ കിട്ടീല

പിന്നെന്തേ മാവേലി, ഓണം വന്നു?

ഇച്ചേച്ചി വന്നില്ല പിച്ചിപ്പൂ കോർത്തീല

പിന്നെന്തേ മാവേലി, ഓണം വന്നു?

അപ്പച്ചി വന്നില്ല ഉപ്പേരി തന്നീല

പിന്നെന്തേ മാവേലി, ഓണം വന്നു?

നല്ലോണമായാലുമെല്ലാരും വന്നാലും

എന്റച്ഛൻ വന്നാലേ ഓണമുള്ളു.

എഴുതിയത്..
വസുമതി
റിട്ടയേഡ് അദ്ധ്യാപിക
സ്വദേശം ആലുവയ്ക്കടുത്ത് മാറമ്പള്ളി